Halverwaeges ’t smaalste getske in de binnestad is op de moor aan de linkerkant ein koperkleurig bördje bevestig ter gruuette van ein naambördje. ’t Is zeuke, rechs naeve de graffiti A0 1566. Op d’n teks op det bördje steit: ‘Vastelaoves zaoterdaag Bert Stoop †’. Bert Stoop waas lid van de legendarische toepclub Caecus non videt. In ‘t Venloos beteikent dit ‘nen Blinde zuut niks’. Opgerich in 1972 of 1973, kump de ‘dinksportclub’ al mier as einen halven ieëw same. D’n hechte groep vrinde ging op vastelaoveszaoterdaag altied op de lappe. Zeej kwame altied door ’t Ursulasträötje, wao ein groepsfoto woort gemak. Nao ’t euverlieje van Bert Stoop haet deze vrindeclub as herinnering det plaetje dao bevestig.















