Museum van Bommel Van Dam is gevestig in ‘t veurmalige Pos- en Telegraafketoeër. In 1945 loog de binnestad van Venlo deils in puin as gevolg van ein serie geallieerde bómbardemente bedoeld veur de Maasbrökke. Ein accommodatie veur groeëte festiviteite óntbrook, terwiel dao in ’t bevrijdingsjaor 1945 vanzelfspraekend behoefte aan waas. Wies det einen heldere geis zich realiseerde det de groeëte kelder ónder ’t Posketoeër laegstónd. Met toestumming van de PTT kwaam in de krochte van det gebouw café De Postkelder. In de roes van de herwónne vreejheid woorte d’r ónstumige feeste georganiseerd, wao ónder samekómste van vastelaovesgezelschap Jocus.
Loup beej gelaegenheid ens beej museum van Bommel van Dam nao binne. De kelderverdeping is gratis toegankelik en is noow ’t zoegeheite Zichtdepot. Achter glaas staon museumobjecte. Kort nao de bevrijding woort op dees plaats oetbundig vastelaovend gevierd door de generatie van de gebómbardeerde. In 1946, tiedes de ierste nao- oorlogse vastelaovend, galmde heej hiel waat kiere:
‘Sjeep, sjeep, sjeep,
Ge kint toch ‘ne sjeep.
Ge wet waal, zó’n dink wao ‘n blikske aan hingk,
en det as 't riejt nao petroleum stink.
Sjeep, sjeep, sjeep,
Ge kint toch ‘ne sjeep.
Bekieks ste zó’n kisje van achter en veur,
De zuks, maar de vinds gen deur.’
Je raakt niet uitgekeken in Venlo
Beluister het liedje



















